Saya menerima tulisan, artikel, ataupun berita perjalanan/ kejadian untuk dipublikasikan di blog ini. Terutama kritik dan saran-saran yang sehat dan dari pemikiran positif, untuk dapat lebih mengembangkan dan memperbaiki blog ini.

Friday, March 30

Jamita Minggu Palmarum 01 April 2012


Markus 11 : 1 - 11
MANOMU ALA NAUNG TANGKAS MANANDA JESUS
Turpuk on ima mamaritahon taringot tu pardalanan ni Tuhan Jesus rap dohot siseanna mamongoti huta Jerusalem. Nasida laho tusi naeng marpesta Paskah. Sasintongna pardalanan na dokdok do on di Tuhan Jesus, ai ingkon gohanNa nama parsuruon ni AmaNa tu Ibana di portibi on. AdopanNa nama hau pinorsilang, ai Ibana do Mesias naung binagabagahon ni Debata.
Di naung jonok nasida tu huta na margoat Betpage dohot Betania, disuru Tuhan Jesus ma dua halak  siseanna mambuat halode na tambat di sada sosor bahen hundulanNa (ay. 2; Laho ma hamu tu sosor na di jolomuna an.... dapot hamu ma tambat disi sada anak ni halode). Marhite i dipatuduhon do: Jesus do nampuna saluhutna na adong di portibi on, ai di boto do manang didia angka nampunaNa i maringanan jala boha situasi/ kondisina (naso boi diida mata ni jolma, ungkap do di jolo ni Jesus). Jala tarida do disi hubungan kerjasama na denggan antara Jesus dohot siseanna, ai dioloi siseanNa na dua i do parsuruon ni Jesus. Jala Jesus tongtong marpanatapan tu jolo, dibohali do siseanna i taringot tu aha na naeng adopan nasida. Didok Jesus “Molo adong na manungkun, dok hamu ma: Na porlu di Tuhan i do i (ay. 3)”.
Dung saut dibuat sisean i halode i, ditogu ma tu Jesus, diampehon ma ulos tu atasna  jala marsihundul ma Jesus disi (ay. 7). Pilihan “Halode” songon parsihundulan ni Jesus naeng patoranghon taringot tu harajaon ni Jesus na gok halambohon dohot hadameon, huhut di bagasan serep ni roha do Jesus mamasuhi huta Jerusalem. Jesus ro ndang na laho manggulut harajaon ni portibi jala mamboan bangso Israel malua sian gomgoman ni Halak Rom; alai Ibana ro mamboan hadameon jala mangusung sude dosa ni hajolmaon on tu abaraNa, songon anak ni halode i namangusung angka boban di tanggurungna. Marasing do sian “hoda” na jotjot dipangke angka raja ni portibi on mamasuhi sada huta. Hoda ima lambang ni kekuatan / parporangan.
Mansai denggan do penyambutan ni angka na torop i di Jesus. Dipahembang do ulosna tu tano i dipangamparhon angka bulung rata tu dalan i, huhut manjouhon: “Hosianna! Pinuji ma na ro marhiehite goar ni Tuhan i” (ay. 8-9). Sudena i patuduhon na tung mansai las situtu rohanasida di haroroni Tuhan Jesus di Jerusalem. Boasa tung mansai las rohanasida? Ala dihirim bangso i asa bangkit Jesus gabe raja manggomgomi bangso i, mamboan nasida malua sian angka parungkilon na sai laon. Di panghilalahon nasida do ndang adong hagogoon na gumogo sian  hagogoon ni Debata. Dibahen i penyambutan na pinatupa nasida tu Tuhan Jesus songon tanda do i mandok mauliate tu Debata ala nunga diparrohahon Debata nasida.
Panjangkonon na mansai meriah na pinatupa ni bangso Israel tu Tuhan Jesus holan sanghidop mata do, ai nasida do gabe balik mamparsilangkon Tuhan Jesus. Disi dang hombar tu na piningkiran nasida haroroni Tuhan Jesus. Jotjot situtu do dang hombar tu na adong di pingkiran/ sangkapta na masa di ngolunta. Torop do jolma manuanhon tu bagasan rohana molo nunga Tuhan Jesus na gabe donganna, sude angka na sinangkapan ni rohana ingkon tulus. Dibahen i taharingkothon ma panandaon di diri dohot panandaon di Tuhan Jesus.
Di Minggu Palmrum on, taingot ma angka pambahenan ni Jesus, mangurupi hita do i mananda ise do Jesus. Ima Debata parholongroha na so hatudosan, na rade mangalehon diriNa paluahon angka na tinompaNa. Amen.

Saturday, October 8

Hatorangan ni Jamita Minggu 09 Oktober 2011


Psalm. 118 : 22 - 29
Huria ni Tuhanta na hinaholongan di bagasan Kristus Jesus, adong do pandohan ni halak Batak mandok “sala mandasor sega luhutan”, na marlapatan do i molo sala dasorna, ndang ture be luhutan i boi jongjong, mura ma i masursur, mura ma sega, jala eme na di luhutan i pe ndang be tutur, maol nama buaton laho mambuat biurna i. Suang songoni ma haporseaonta i, molo sala do dasor/ ojahan ni haporseaon i, sega do parngoluonta, ndang maratur be ngolunta on, jala boi ma mura hita mandele molo ro angka hamaolon di tongatonga ni ngolunta, olo ma mura hita mangulahon hajahaton di nglunta on. Ido na masa di tongatonga ni ngolu ni angka halak parbegu di tingki parngoluon ni parpsalmen on. Diparhatopot parpsalmen i do naung mansai godang sian angka parbegu manghaliangi ibana na marsangkap mandabuhon dohot mangambati ibana di ulaonna, alai laos disi do dihilala ibana gogo dohot pangurupion ni Debata paluahon ibana sian angka parbegu jala saut monang di paraloanna (ay. 13). Sasintongna di pamerengan ni angka parbegu di tingki i, ndang mararga be parpsalmen suang songoni bangso na ginonggomanna, ndang marguna be ngoluna tarsongon batu naung binolongkon ni angka pande bagas, na lea, naso tarpangke manang naso marlapatan be. Alai disi do ibana dipabangkit Debata gabe halak na margogo, gabe bangso na sangap jala na tarbarita tu angka luat na asing. Ibana do gabe batu parsuhi manang batu ojahan na arga situtu.
Hamu angka dongan, laos martudutudu do pandohan ni parpsalmen on tu hadirion ni Jesus Kristus na ro tu portibi on mamboan haluaon tu angka na porsea di Ibana. Ndang mararga Jesus di pamerengan ni bangso Israel/ Jahudi di tingki i. Haru i tahe penulakion/ pangaloon do dipatuduhon halak Jahudi maradophon Jesus. Huasona be do dipangasahon angka parhuaso laho mangaleai dohot manangkup Jesus, tarsongon epistel ta i molo tajaha disi, di tingki tartangkup si Petrus dohot si Johannes tu jolo ni angka sintua ni malim, gogogogo do soara nasida mandok “huaso nise dipangasahon ho patupahon i?” tarida do sian i ginjang ni roha ni angka parhuaso di tingki i na menganggap dirina tumimbo sian manang ise pe. Hape ndang diboto nasida Jesus na pinalea nasida, na dianggap ndang mararga, na binolongkoin nasida, Ibana do na gabe batu parsuhi, na arga, na sangap, siboan haluaon tu sude jolma na di hasiangan on. Ndada holan di tingki i, alai sahat tu ajal ni hasiangan on.
Huria ni Tuhanta....mansai arga parsiajaran na boi putihonta sian turpuk on, ima
1.    Soootung madabu hita tu pangalaho na niadopan ni Jesus sian angka halak Jahudi di tingki i. Sotung lea rohanta mida angka na gale, na pogos di na humaliangta. Adong do pandohan ni halak Batak mandok : “ndang hapolpolan mataniari binsar” ninna, na marlapatan do i ndang haambatan hita sangkap ni Debata, molo lomo rohaNa mangurupi angka na pogos i, na lea i boi do i muse gabe jolma na sangap, sumangap sian hita tahe. Alani taargahon ma angka donganta. Tabahen nasida doshon dirinta, rap na tinompa ni Debata.
2.    Naeng dohonon sian turpuk on, pasti do sude hita marpanghirimon di ngolu na tarpasupasu, di ngolu na marhasonangan (ay. 26). Alani sada do dalanna laho tusi ima taparangehon ma hataNa na badia i, tapahombar ma parngoluonta tu lomo ni rohaNa. Songon dia do na mangulahon lomo ni rohaNa? Ndada holan na burju marminggu, ndada holan na burju tu partangiangan, sotung tarimpu naung cukkup i amang inang dohot angka dongan na pungu dison, alana jotjot do hita on holan mamboto alai ndang mangantusi, mangantusi alai ndang porsea, porsea alai ndang manghangoluhon. Tarsongon Mat 7 : 21 i didok : “ndang sude na mandok Tuhan bongot sogot tu harajaon banua ginjang i”. Na naeng dohonon sian i ima dituntut do sian hita angka na porsea reaksi na lebih nyata dope ima panghangoluhononhon di hata ni Debata, huhut marhabiaran jala marposniroha na marhuaso jala mangolu do Debata.
3.    Naeng ma marhite turpuk on margogo hita mangadopi angka na maol di tongatonga ni ngolunta. Ndang hea ditadingkon Debata tarpunjung angka na hinaholonganNa, alai didongani jala diurupi do. Boi do hita mangadopi godang tantangan di tano on, alai ndang jadi hita mandele manang marsak ala ni i. Jesus (batu) naung binolongkon ni angka pande bagas i pe rade do manaon haporsuhon, sitaonon, hamatean jala monang marhite haheheonNa, mambaen Ibana bangkit gabe batu parsuhi naso tarpaunsat ni manang ise pe.
4.    Sada ulaon na mansai maol di tongatonga ni ngolunta ima manghasomalhon ngolu na mandok mauliate, tu dongan, tarlumobi tu Debata. Alani marhite turpuk on, tapanghilalahon ma pangurupion ni Debata, jala mandok mauliate ma hita di saluhut pambahenanNa, ai Ibana do pardengganbasa, jala rodi salelenglelengna do asinirohaNa (ay.29).  Amen.

Friday, October 1

Sermon Epistel Minggu XIX Dung Trinitatis, 10 Oktober 2010

                                               1 Timoteus 4 : 13 - 16

        Jongjong do huria na parjolo i songon parbue ni hasasaor ni Tondi Parbadia. Mangerbang do angka parpunguan ni halak Kristen, alai ihut tusi tubu do angka rumang ni parpoda haliluon na mambahen sumurut haporseaon ni rus ni huria i. Alani ndang tagamon so ganggu roha ni si Timoteus manguluhon huria i na didosak parpoda haliluon i, tarlumobi ala ni habajaronna dohot pengalaman na otik dope. Alani ma dipasahat apostel Paulus surat on laho mambohali si Timoteus asa lam tau manguluhon huria i dohot mangalo parpoda haliluon. Ingkon tongtong do si Timoteus paturehon roha nang pangalaho asa nang pe poso ibana di umur, alai matoras ma di hata dohot pangalahona songon sahalak siihuthon Kristus.
        Asa tau si Timoteus manguluhon huria i jala margogo mangalo parpoda haliluon, adong manang pigapiga siulahononna, ima:
1. Ringgas manjaha (ay. 13). Marhite na mandatdati manjaha buku na badia i, botoonna ma angka poda na sintong, dapot parsiajaran dohot hapistaran, gabe margogo mangadopi parpoda haliluon na malomalo manghatai.
2. Mangulahon pangapoion dohot pangajarion (didasko: mamodahon, manogunogu, paingothon, dohot mangalehon panuturion). Jesus Kristus do na gabe tiruan laho mangulahon pangajarion i. Ndang holan marjamita diula Jesus, dipatuduhon do hasintongan ni jamitaNa marhite pangajarion. Marhite i dipapatar Jesus hadirionna songon guru. Diajari Ibana na torop padengganhon paragamaon, pasahathon pelean, martangiang, dna.
3. Papatarhon tohonan na jinalona marhite na mamangke silehonlehon ni Debata dohot marparange na denggan (ay. 14 - 15). Marhite parange na denggan naeng patandahononna dirina sahalak naung matobang di hata ni Debata atik pe bajar umurna.
4. Mamatahon dirina dohot pangajarionna asa gabe tiruan na denggan di tongatonga ni ruas ni huria (ay. 16). Ndang cukup holan manangihon poda sian si Paulus ibana, alai ingkon dohot do pajamothon dirina sandiri.

Sian pangajarion ni si Paulus tu si Timoteus (turpuk on) tahirim do:
1. Jumpang angka parhalado sitiruon di tongatonga ni huria. Boi do lam sumurut haporseaon ni ruas molo ndang jumpang angka parange na denggan dohot sitiruon di ngolu ni parhaladona, molo ndang boi parhalado i gabe pangajari dohot mangalehon panuturion tu ruas ni huria. Sada contoh: boi do ndang tabo jamita ni siparjamita ala ndang diparade jamitana, ala ndang ringgas manjaha. Alani dipaingot do hita asa manguhal angka parbinotoan marhite sian na manjaha. Ai marhite i do lam tamba parbinotoan dohot hatauon di hita laho mangantusi dohot manjamitahon hata ni Debata.
2. Jumpang angka generasi muda na marhaporseaon na togu, tarlumobi di na mangadopi pengaruh ni hamajuon jaman na hatop mubauba.
3. Jumpang parsaoran na denggan di tongatonga ni keluarga. Marhite turpuk on dipapatar do hinaarga ni hubungan keluarga na rap marsaor manangkasi hata ni Debata. Tarida do i marhite pandohan di 1 Tim 1 : 2, “Mandapothon si Timoteus, anakhonku na tutu di bagasan haporseaon…” Jala keluarga i do media na dumenggan pangajaran di hata ni Debata (2 Tim 1 : 5). Molo sitiruon do natoras jala rade mangajari ianakhon marhite barita na uli, tung balga do panghorhon ni mambangun haporseaon jala gabe diboto manirang na denggan dohot na roa huhut diboto manjamothon dirina sian na so hinalomohon ni Debata.