Hatorangan ni Jamita Minggu 09 Oktober 2011

Psalm. 118 : 22 - 29

Huria ni Tuhanta na hinaholongan di bagasan Kristus Jesus, adong do pandohan ni halak Batak mandok “sala mandasor sega luhutan”, na marlapatan do i molo sala dasorna, ndang ture be luhutan i boi jongjong, mura ma i masursur, mura ma sega, jala eme na di luhutan i pe ndang be tutur, maol nama buaton laho mambuat biurna i. Suang songoni ma haporseaonta i, molo sala do dasor/ ojahan ni haporseaon i, sega do parngoluonta, ndang maratur be ngolunta on, jala boi ma mura hita mandele molo ro angka hamaolon di tongatonga ni ngolunta, olo ma mura hita mangulahon hajahaton di nglunta on. Ido na masa di tongatonga ni ngolu ni angka halak parbegu di tingki parngoluon ni parpsalmen on. Diparhatopot parpsalmen i do naung mansai godang sian angka parbegu manghaliangi ibana na marsangkap mandabuhon dohot mangambati ibana di ulaonna, alai laos disi do dihilala ibana gogo dohot pangurupion ni Debata paluahon ibana sian angka parbegu jala saut monang di paraloanna (ay. 13). Sasintongna di pamerengan ni angka parbegu di tingki i, ndang mararga be parpsalmen suang songoni bangso na ginonggomanna, ndang marguna be ngoluna tarsongon batu naung binolongkon ni angka pande bagas, na lea, naso tarpangke manang naso marlapatan be. Alai disi do ibana dipabangkit Debata gabe halak na margogo, gabe bangso na sangap jala na tarbarita tu angka luat na asing. Ibana do gabe batu parsuhi manang batu ojahan na arga situtu.

Hamu angka dongan, laos martudutudu do pandohan ni parpsalmen on tu hadirion ni Jesus Kristus na ro tu portibi on mamboan haluaon tu angka na porsea di Ibana. Ndang mararga Jesus di pamerengan ni bangso Israel/ Jahudi di tingki i. Haru i tahe penulakion/ pangaloon do dipatuduhon halak Jahudi maradophon Jesus. Huasona be do dipangasahon angka parhuaso laho mangaleai dohot manangkup Jesus, tarsongon epistel ta i molo tajaha disi, di tingki tartangkup si Petrus dohot si Johannes tu jolo ni angka sintua ni malim, gogogogo do soara nasida mandok “huaso nise dipangasahon ho patupahon i?” tarida do sian i ginjang ni roha ni angka parhuaso di tingki i na menganggap dirina tumimbo sian manang ise pe. Hape ndang diboto nasida Jesus na pinalea nasida, na dianggap ndang mararga, na binolongkoin nasida, Ibana do na gabe batu parsuhi, na arga, na sangap, siboan haluaon tu sude jolma na di hasiangan on. Ndada holan di tingki i, alai sahat tu ajal ni hasiangan on.

Huria ni Tuhanta....mansai arga parsiajaran na boi putihonta sian turpuk on, ima

1.    Soootung madabu hita tu pangalaho na niadopan ni Jesus sian angka halak Jahudi di tingki i. Sotung lea rohanta mida angka na gale, na pogos di na humaliangta. Adong do pandohan ni halak Batak mandok : “ndang hapolpolan mataniari binsar” ninna, na marlapatan do i ndang haambatan hita sangkap ni Debata, molo lomo rohaNa mangurupi angka na pogos i, na lea i boi do i muse gabe jolma na sangap, sumangap sian hita tahe. Alani taargahon ma angka donganta. Tabahen nasida doshon dirinta, rap na tinompa ni Debata.

2.    Naeng dohonon sian turpuk on, pasti do sude hita marpanghirimon di ngolu na tarpasupasu, di ngolu na marhasonangan (ay. 26). Alani sada do dalanna laho tusi ima taparangehon ma hataNa na badia i, tapahombar ma parngoluonta tu lomo ni rohaNa. Songon dia do na mangulahon lomo ni rohaNa? Ndada holan na burju marminggu, ndada holan na burju tu partangiangan, sotung tarimpu naung cukkup i amang inang dohot angka dongan na pungu dison, alana jotjot do hita on holan mamboto alai ndang mangantusi, mangantusi alai ndang porsea, porsea alai ndang manghangoluhon. Tarsongon Mat 7 : 21 i didok : “ndang sude na mandok Tuhan bongot sogot tu harajaon banua ginjang i”. Na naeng dohonon sian i ima dituntut do sian hita angka na porsea reaksi na lebih nyata dope ima panghangoluhononhon di hata ni Debata, huhut marhabiaran jala marposniroha na marhuaso jala mangolu do Debata.

3.    Naeng ma marhite turpuk on margogo hita mangadopi angka na maol di tongatonga ni ngolunta. Ndang hea ditadingkon Debata tarpunjung angka na hinaholonganNa, alai didongani jala diurupi do. Boi do hita mangadopi godang tantangan di tano on, alai ndang jadi hita mandele manang marsak ala ni i. Jesus (batu) naung binolongkon ni angka pande bagas i pe rade do manaon haporsuhon, sitaonon, hamatean jala monang marhite haheheonNa, mambaen Ibana bangkit gabe batu parsuhi naso tarpaunsat ni manang ise pe.

4.    Sada ulaon na mansai maol di tongatonga ni ngolunta ima manghasomalhon ngolu na mandok mauliate, tu dongan, tarlumobi tu Debata. Alani marhite turpuk on, tapanghilalahon ma pangurupion ni Debata, jala mandok mauliate ma hita di saluhut pambahenanNa, ai Ibana do pardengganbasa, jala rodi salelenglelengna do asinirohaNa (ay.29).  Amen.