JAMITA MINGGU PALMARUM 28 MARET 2010

MARKUS 14 : 3 - 9
PASANGAP MA JESUS SIAN HOLONG NI ROHAM

1. Molo tajahai barita ni surat Markus, boi dapot hita gombaran ni na masa humaliang ni Jesus, ima: ia di tongatonga ni sangkap na jahat na naeng manangkup jala manjehehon Jesus, adong do halak na mambahen na denggan. Pambahenan na denggan i dipatorang: adong sahalak parompuan na mamiahi Jesus tongon mandapothon pesta Paska. Paska ima sada perayaan agama Jahudi na secara histori marningot haluaon sian Mesir (2 Musa 12). Mangihuthon aturan agama Jahudi, molo mamestahon Paska ingkon sude do halak Jahudi na magodang/ dewasa nangkok tu Jerusalem. Jadi hinorhon ni godang ni halak na nangkok tu Jerusalem ndang hasiatan be nang parbornginan (penginapan), asa boi do halak laho manginap tu luat na jumonok sian Jerusalem isarana huta Betania dohot Betfage. Di turpuk on, Jesus di huta Betania di bagas ni si Simon na huliton najolo (Simon si kusta). Tongon laho mangan nasida, ro sahalak parompuan mamboan sada galas na marisi miak na hushus, na arga, naso marsampur. Dibolai galas i jala diusehon miak i tu ulu ni Jesus. Boasa pola dibolai galas i? Adong hatorangan mandok ia hasomalan ni halak Jahudi, nasa ugasan naung pinangke tu tamue napinarsangapan ndang jadi jamaon manang pangkeon ni manang ise be muse di ari na mangihut, sandok nunga sidung be fungsina. Alani do sude ma miak i diusehon tu ulu ni Jesus.

2. Marnida pambahenan ni parompuan i, pintor adong do halak na bereaksi (marungutungut), pola didok, magoponai miak i dibaen, aut ginadis i lobi sian tolu ratus rupia mangasii na pogos (ayat 4-5). Mangihuthon pamerengan ni Jesus, reaksi na so denggan doi, alani ma dimuruki Jesus nasida. Halak na marungutungut di humaliang ni Jesus dohot parompuan i ima gombaran ni hamaolon laho mangulahon na denggan. Hamaolon laho mangulahon na denggan boi do ro sian duru ni hadirion (orang lain) alai laos boi do ro sian hadirion ni jolma i sandiri. Ungutungut ima pataridahon roha na so ias, na so bulus. Roha na so ias jala bulus marpanghorhon do i tu kualitas ni ulaon. Pangkorhonna ima patubuhon hadirion na malas (mago las ni roha). Sandok na hurang denggan doi di jolo ni Debata. Jala laos adong do na bisuk mandok: "Molo laho mangula ulaon ho, sotung jumolo ho marungutungut jala mandok malas", ala molo jumolo marungutungut huhut malas, gabe tubu ma hamaolon di ibana, alani gabe moru ma nang kualitas ni ulaonna. Sandok tahe dipinsang Jesus do halak parungutungut..

3. Unang tarlambat mangulahon ulaon na denggan. Adong do pandohan mandok: "Sebuah pemberian jauh lebih bernilai bila diberikan pada saat yang tepat". Misalna: memberi segelas air di gurun pasir jauh lebih berharga daripada memberikan seember air di tepi sungai. Tu pangalaho na songoni do diarahon Jesus nasida angka na marungutungut jala nasida na manarihon angka na pogos i. Alani do didok: "Ai tongtong do adong na pogos di tongatongamuna; jala asal ma olo hamu, tarpatongon hamu do na denggan tu nasida, alai anggo Ahu ndang manongtong di hamuna, intap ni na tarbahensa do na niulana i, na manjoloani do ibana mamiahi pamatangku songon di na mananom". Dipatuduhon Jesus do songon naung diboto Ibana na naeng masa tu Ibana. Ndang manongtong be nasida rap dohot Jesus, alani di kesempatan rap dohot Jesus ma nian dipatupa na denggan, dipatuduhon ma aha sipatupaonna, ala molo dung masa hamamate i ndang ringkot be sudena i. Panindangion haporseaon ni halak na porsea mansai ringkot dihatindangkon uju di ngoluna, jala tapatupa mai dohot laho manarihon angka na pogos, tu nasida ma saonari tapatuduhon holong ni rohanta tu Jesus, ai didok Jesus do: "Nasa na binahenmuna tu sada sian anggiku na metmet on, na tu Ahu do i dibahen hamu (Mat. 25:40). Ido hape asa dialusi Jesus nasida: Ai tongtong do adong na pogos di tongatongamuna, jala asal ma olo hamu, tarpatongon hamu do na denggan tu nasida". Mangulahon ulaon di tingki na lehet mansai ringkot dihobasi saluhut halak na porsea. Gari parende Batak mandok: "So marlapatan....molo dung mate au...Uju di ngolungkon ma nian..tupa ma bahen angka na denggan...asa tarida sasude holong ni rohami....".

4. Ndang marisuang nasa ulaon na denggan na tapatupa i. Pandohan ni Jesus di ayat 9: "Situtu do hatangkon tu hamu...hatahononna do nang na binahennai gabe baritana." Marlapatan do i: sai na tarbarita do jolma di angka ulaonna di ngoluna. Gabe sipaingot ma i tu halak na porsea paboa ndang marisuang nasa pambahenan na denggan na pinatupana, ala gabe barita siihuthonon do i muse tu angka tingki na mangihut. Jala didok do: "Ndang marisuang halojaonmuna di bagasan Tuhan i" (1 Kor. 15:58b). Alani, aha ma na denggan sipatupaonta na gabe tiruan, siihuthonon jala sibaritahonon ni halak na asing asa gabe peleanta tu Jesus raja ni hangoluan i?

cln. gr. pitu sinaga