Jamita Minggu Jubilate 25 April 2010

              ULAON 15 : 6 - 18
  
Mansai denggan do ulaon panghobasion ni Apostel Paulus dohot si Barnabas di Antiokhia, pola do sude ruas ni huria na disini mangalehon rohana tu huria marhitehite angka pambahenanna be isarani na mangulahon holong dohot panumpakion tu angka huria na asing isarana Jerusalem . Alai di tongatonga ni situasi i muncul do angka hamaolon manang persaoalan-persoalan naimbaru so holan sian tongatonga ni halak naso manghaporseai Debata, alai justru sian angka halak Jahudi  naung gabe Kristen do (ay. 5). Disangajo nasida do ro sian Judea tu Antiokhia laho manggugai haporseaon ni ruas i taringot tu sunat. Sasintongna, dijalo nasida do hamamasuk ni angka sipelebegu gabe  Kristen marhitehite pandidion na badia, suang songoni diparhatopot nasida panobusion ni Jesus Kristus manesa dosa ni portibi on. Alai mansai  diharingkothon nasida do na ingkon jolo tarsunat asa boi manjalo haluaon naung pinatupa ni Jesus i (ay. 1), jala diparhatopot nasida do sunat i do na gabe pamusatan ni padan ni Debata tu si Abraham, na gabe sada patik na ingkon siradotan ni angka halak Kristen na ro sian sipelebegu. Sandok tahe, ndang sahat haluaon i molo so jolo tarsunat jala unduk tu patik ni si Musa. Ido umbahen na guntur huria i huhut mandosak Apostel Paulus dohot Barnabas laho pasidunghon parsalisian i.

          Borhat do si Paulus dohot  si Barnabas rap dohot pigapiga halak sian tongatonga nasida manopot angka apostel dohot angka pangituai na di Jerusalem laho pasidunghon salisi i. Dipatupa nasida ma parrapoton laho mangalului haputusan taringot tu persoalan i.  Jumolo do dipatorang si Paulus dohot Barnabas balga ni pambahenan ni Debata di pardalanan ni ngolu panghobasion nasida. Godang do halak na gabe porsea sian naso Jahudi ala ni ulaon ni Tondi Parbadia. Kenyataan on patubuhon las ni roha di tongatonga nasida. Dipatorang si Petrus do pangulaon ni Debata naso siida bohi (mardingkan) mangalehon haluaon tu saluhut jolma, termasuk ma na manjangkon angka sipelebegu (10:34-35; 11:1-18). Diparhatopot si Petrus do ndada holan alani patik umbahen na malua jolma i, alai holan ala ni asi ni roha ni Tuhan i sambing do (ay. 11, pat. Rom. 10 : 4). Alani do dipaingot si Petrus angka halak Jahudi sian rongkonan ni parise unang mangunjuni Debata marhitehite parbinotoan dohot habisukonna  sandiri. Ai atik pe adong angka aturan/tradisi na ingkon siulahononton  mangaradoti patik i, alai ndang jadi bahenon i gabe siarat mutlak manang gabe auga na dokdok di angka na naeng manghaporseai Debata.

            Ditolopi angka donganna na debanari do panindangion ni si Petrus. Diboto si Jakobus do na mansai maol tarjalo roha ni halak Jahudi hajongjongan nasida naung  sarupa dohot naso Jahudi di adopan ni Debata. Alani do dipatangkas si Jakobus na dohot do sipelebegu dipangke Debata laho mamaritahon barita nauli, lapatanna dohot do angka halak na asing ingkon parsidohot tu harajaon ni Debata. Marhite pandohan i naeng ondolhononna naso adong be parholangan ni halak Jahudi dohot naso Jahudi di bagasan Tuhan i. Dos do hajongjongan ni jolma i di adopan ni Debata, jala saluhut do rap naung pinalua marhitehite haporseaon di asi ni roha ni Tuhan i.

            Songon halak naung manjalo asi ni roha ni Debata hita marhite haluaon di bagasan Jesus Kristus, aha ma sipatupaonta? Parjolo: Tahamauliatehon ma asi ni roha ni Debata di ngolunta paboa naung dipalua Debata hita jala tahatindangkon ma godang ni pangulaon ni Debata di tongatonga ni ngolunta. Paduahon: Boi do masa parsalisian ala ni angka aturan na marasing di tongatonga ni huria i, jala boi do ro angka tantangan nang sian duru ni huria pe, gabe ndang jumpang hasadaon na masiurupan, alani sipasidingon do angka pingkiran na boi manegai parsaoran di tongatonga ni huria. Patoluhon, hombar tu goar ni Minggunta sadarion “Jubilate”, tama marolopolop jala marlasniroha hita marningot asi ni roha ni Debata di ngolunta naung patupahon haluaon di hita (Psalm. 66:1).  Tanda ni na marlasniroha, ingkon marparbue pangulaonta marhitehite na mamaritahon barita nauli tu tongatonga ni saluhut bangso. Lapatanna gabe ngolu na marpanindangi ma ngolu ni naung taruli di asi ni roha ni Debata. Amen.