Sermon Jamita Minggu Quasimodogeniti 11 April 2010

1 JOHANNES  2 : 1 - 6

Pangalaho na masa di turpuk on: di parujungan ni taon 100-an M, lam marmullopan do poda haugamoon humaliang huria na parjolo i. Diondolhon nasida do ala tubu Jesus songon jolma na somal, tontu marrumang do Ibana, jala ala marrumang  do, tontu “maya/ndang manongtong” Ibana. Alani didok nasida naso Debata situtu Tuhan Jesus Kristus jala ditulak nasida hajolmaon ni Jesus Kristus. Ido umbahen na hehe panurat ni 1 Johannes on laho patoguhon haporseaon ni huria i, asa manghaposi jala marhatopothon Jesus Kristus naung ro di bagasan daging huhut asa marparbuehon holong songon angka na porsea naung manjalo haluaon.

2.      Hatorangan ni Turpuk

Bangko ni jolma ima mangoloi hagiot ni rohana mambahen jolma i madabu tu dosa/ pangalaosion, melanggar aturan/ patik naung tinotophon ni Debata, gabe hona rimas ni Debata jolma i. Alai tumimbo do holong ni Debata sian rimasna, jala ido na taida di turpuk on marhite haroro ni anakNa gabe pangondianta jala gabe pardengganan pasaehon dosa ni jolma dohot portibi on. Jotjot do kabur partinandaanta ala ni dosa na taula i, ndang boi taradoti tona/ patik na nilehon ni Debata, hape patik i do patandahon hita dohot Ama i jala gabe siparorot manang dalan asa taboto lomo ni roha ni Debata siulaonta. Hataridaan ni naung tatanda Jesus, ingkon tangkas ma tarida di parange/ ulaon siganup ari ima na mangaradoti patik jala marparange di bagasan hatiuron huhut marholong ni roha. Molo tadok tatanda Jesus, hape ndang taradoti jala taulahon patikNa, pargabus ma hita disi, ai ndang tutu hita siihuthon Kristus manang naung sinesaan dosanta molo gabe dao sian Jesus na mangondihon i. Pangauhonon di pangulaon ni Debata di ngolunta ingkon papataronta marhite na mangaradoti patikNa. Alai naeng torang boha do dalanta uju papatarhon pangauhononta i, ima mangulahon joujou ni tondi ni patik i, ndang apala mangondolhon hata ni surat i sambing. Lapatanna naeng do sahat tu tondi ni Patik i, ala jumotjot di jolma i/ halak na porsea mangulahon patik i hombar tu sisiasia ni hata i, alai gabe sumisi do joujou ni tondi ni patik i.

3.      Sipahusorhusoron

a.       Joujou asa marparange di bagasan hatiuron huhut mian di bagasan holong ni roha do apala na rumingkot taida di turpuk on. Tarlumobi di tongatonga ni masyarakat na digohi persaingan di godang panggulmiton ni ngolu, baik ma i di bidang politik, ekonomi. Sosial, pendidikan, kebudayaan dohot angka na asing. Sipata masipatudu haboionna be do jolma i laho merebut jabatan. Marsaing ketat do godang halak di bidang bisnis, pola na sahat tu na masilatean/ masihosoman laho palangkuhon tigatigana. Marbadai do sipata halak, pola ndang masipangkulingan angka na marhombar bagas bahkan na marrumatangga, marmusu nang angka na martondong hian. Masiondaman do godang halak ala ni pangantusion na marasing di ngoluna, jala lan dope angka pangalaho na asing na maralo tu lomo ni roha ni Debata. Alani holan sada do na boi mangubati saluhutna i, ima hata ni Debata dohot keteladanan na pinatuduhonNa marhite na marsuru anakNa bahen pardenggananta dohot Debata.

b.      Haholongon i ndada sian roharoha ni hajolmaon manang sian parbinotoan ni portibi on, alai holan sian Debata sambing do na tuk mangalehon hasonangan dohot las ni roha na so marpansohotan. Asa molo mian hita di bagasan holong ni roha, gabe mian ma Debata di bagasan hita jala hita di bagasan Ibana.