Jamita Minggu Miserikordias Domini 18 April 2010

LUKAS 17 : 11 - 19

                                           

Sian sude ulaon panghobasion ni Jesus di ngoluna, tarlumobi na patupahon hamalumon dohot pangurupion tu angka na gale dohot na marsahit (Luk. 5 : 12-16; 7 : 1-10; 9 : 37-45), tontu tarbarita do Ibana tu luat angka na humaliang, gabe lam martambatamba angka halak na mangihuthon Ibana jala na maimaima di haroroNa mangalehon pangurupion.

Suang songoni do uju di pardalanan Jesus mamolus huta Galilea dohot Samaria laho tu luat Jerusalem, pajumpang ma Ibana dohot sampulu halak na huliton na jongjong mandaodao sian Ibana. Boasa mandaodao? Di patik ni Jahudi diorai do angka halak na huliton marsaor dohot angka na hipas, ingkon punjung do nasida jala ingkon di balian ni parsaraon ingananna (3 Musa 13 : 46), ai dietong do nasida halak na mardosa, na pogos, pangidoido, jala sipasidongon ni jolma. Sandok mansai lea do nasida di pamerengan ni angka natorop hatiha i. Alani do mandaodao nasida huhut joujou: “Jesus, Guru! Asi ma rohaM di hami”.

Dipatuduhon nasida do pos ni rohana di huaso dohot hagogoon ni Tuhan i laho paluahon nasida sian hapariron i, ima parsahiton na niae nasida. Jala diparhatopot nasida do naso adong hasurungan nasida sian na asing umbaen na marserep ni roha nasida mangido pangurupion sian Ibana.

Tutu ditangihon Jesus do pangidoan nasida i, atik pe ndang pintor dipamalum Jesus  parsahiton nasida. Didok Jesus: “Laho ma hamu patuduon dirimuna tu angka malim”. Adong do patik di halak Jahudi, ingkon malim do manangkasi halak naung malum sian na huliton asa boi muse ibanan marsaor dohot natorop (3 Musa 14 : 2 ff). Alani ma umbahen na disuru Jesus nasida mandapothon malim i. Ra mansai maralo do pandohan on tu roha ni angka na huliton i, ai ndang malum dope sahit nasida nunga disuru patuduhon dirina tu malim. Alai nang pe maralo i di roha nasida, umbalga do pos ni roha nasida, jala dipatuduhon pangoloionna di Jesus, gabe monang haporseaonnasia martimbangkon parungkilonna, laos malum nasida di na borhat mandapothon malim i.

Di pambahenan ni Jesus tu na huliton i, tama nian nasida mandok mauliate tu Ibana. Alai sian na sampulu halak na pinamalum ni Jesus, holan sahalak do na ro mandapothon Ibana huhut dipagogo soarana mamuji Ibana. “Dipatungkap do dirina tu jolo ni Jesus mandok mauliate”. Ditanda halak Samaria i do dirina naso patut manjalo pangurupion i, alani marlas ni roha situtu ibana mandok mauliate tu Jesus. Halak pardosa na lea di pamerengan ni Jahudi uju i, naso masuk tu horong ni na manghaporseai Debata jala angka sipasidingon, ido na gabe manghamauliatehon pambahenan ni Jesus di ngoluna. Diparhatopot ibana do holan ala ni Jesus umbaen na boi ibana imbaru jala badia, jala dijalo ditongatonga ni parsaoran songon halak na hipas.

Pangalaho sisongoni do na pinangido ni turpuk on sian hita halak Kristen. Sude do hita angka naung hea mandai pangurupion sian Tuhan i, alani ringkot sungkunonta dirinta be, taingot do mandok mauliate tu Tuhan i? Sotung do songon na huliton na sia nari hita, di tingki mangadopi hamaolon dohot angka parungkilon tagogo manjou goar ni Tuhan i, hape dung tajalo pangurupion i, lupa hita mandok mauliate tu Ibana. Taingot ma holan Tuhan i do na tuk mangalehon pangurupion tu hita di angka panggulmiton ni ngolunta. Goar ni Minggunta “Miserikordias Domini” marlapatan “Gok asi ni roha ni Jahowa do sandok tano on”. Alani tajou ma goarNa di angka hamaolon na taadopi huhut mandok mauliate di sandok denggan basaNa, songon na nidok ni Psalm 50 : 15 “Jala jou ma Ahu jumpa di ari hagogotan, asa hupalua ho, asa dipuji ho Ahu”. Amen